Breyta láni
Lánabreytingar eru fyrir sjóðfélaga sem eru með lán hjá Gildi. Eftir útgáfu láns geta komið upp aðstæður sem kalla á breytingar, til dæmis vegna kaupa á nýju húsnæði eða tímabundnar breytingar á tekjum vegna fæðingarorlofs eða atvinnuleysis. Öllum breytingum á lánum þarf að þinglýsa og í sumum tilfellum þarf samþykki frá síðari veðhafa og ef til vill þarf nýtt greiðslumat.
Eftirtaldir möguleikar standa lántakendum til boða:*
Ert þú að kaupa nýja eign og vilt flytja gamla lánið með þér? Stundum getur verið hagkvæmara að flytja núverandi lán á nýja eign fremur en að taka nýtt lán.
Slíkt fer eftir kjörum núverandi láns og þeim lánamöguleikum sem eru í boði hverju sinni ásamt veðsetningarhlutfalli á nýrri eign.
Skilyrði fyrir veðflutningi er að lán sé í skilum og að veðstaða láns eftir veðflutning fari ekki umfram hámarksveðhlutfall samkvæmt lánareglum sjóðsins. Skuldarar á veðflutta láninu þurfa enn fremur að vera þeir sömu og þinglýstir eigendur á eigninni sem veðflutt er á. Ekki er heimilt að veðflytja lán með breytilegum vöxtum.
Veðflutningur er háður samþykki sjóðsins!
Umsókn: Beiðni um veðflutning
Gögn sem þurfa að fylgja umsókn um veðflutning:
Gögn sem þurfa að fylgja umsókn um veðflutning:
- Beiðni um veðflutning.
- Lánanúmer áhvílandi láns/lána sem óskað er eftir að veðflytja.
- Veðbandayfirlit (sjóðurinn getur útvegað - gjald samkvæmt gjaldskrá).
- Fasteignamatsvottorð (sjóðurinn getur útvegað - gjald samkvæmt gjaldskrá).
- Samþykkt kauptilboð.
Allir geta lent í þeim aðstæðum að tekjur skerðist tímabundið og átt í erfiðleikum með að greiða af lánum sínum. Ýmsar leiðir eru mögulegar til að auðvelda hverjum og einum að takast á við minni greiðslugetu. Mikilvægt er að hafa samband tímanlega til að leita leiða sem henta viðkomandi.
Helstu leiðir eru:
- Lenging lánstíma
- Breyting jafnra afborgana í jafnar greiðslur
- Endurfjármögnun - breyta um lánategund og/eða afborgunartegund og lengja lánstíma
- Frysting - greiðslufrestur í allt að 6 mánuði
- Bæta vanskilum við höfuðstól - hvert mál er metið fyrir sig og hafa þarf samband við sjóðinn
Frestun er tímabundið úrræði og hægt að grípa til við vissar aðstæður. Hægt er að óska eftir greiðslufresti á íbúðarlánum frá þremur mánuðum í allt að sex mánuði vegna tímabundinna greiðsluerfiðleika svo sem atvinnuleysis, veikinda eða slysa.
Einnig er möguleiki á að frysta lán vegna tekjuskerðingar í fæðingarorlofi.
Að frysta lán felur í sér að lántaki greiðir ekki af láninu á meðan frysting er í gildi. Vextir og verðbætur bætast við höfuðstólinn og lánið lengist um þann tíma sem frystingu nemur. Hafa ber í huga að greiðslubyrði hækkar þegar greiða á af láninu á ný.
Allar umsóknir um greiðslufrest eru metnar og eru háðar samþykki sjóðsins.
Umsókn: Umsókn um greiðslufrest lána
Eftirfarandi upplýsingar þarf að hafa í huga varðandi umsókn um greiðslufrest:
- Lán þarf að vera í skilum og lántaki má ekki eiga langa sögu um frystingu lána
- Tilgreina þarf ástæðu fyrir beiðni um greiðslufrest og æskilegt er að láta eftirfarandi gögn fylgja með eftir því sem við á: Staðfesting frá Vinnumálastofnun, læknisvottorð eða greiðsluyfirlit frá fæðingarorlofssjóði
- Ekki er veittur greiðslufrestur vegna framkvæmda
Eftir að skuldabréf eru gefin út er hægt að óska eftir breytingu á láninu. Hægt er að stytta eða lengja lánstíma, en óheimilt er að lengja lánstíma lána með breytilegum vöxtum. Einnig er hægt að breyta greiðsluformi úr jöfnum afborgunum í jafnar greiðslur eða öfugt. Á lánum með breytilegum vöxtum er þó óheimilt að breyta greiðsluformi úr jöfnum afborgunum í jafnar greiðlur. Ef breyting hefur í för með sér meira en 20% hækkun á greiðslubyrði þarf að fara í gegnum greiðslumat.
Þeir sem vilja skilmálabreyta láni eru beðnir um fylla út umsóknina Beiðni um skuldbreytingu (PDF form) og senda inn á lánadeild Gildis í gegnum netfangið lan@gildi.is ásamt eftirfarandi gögnum:
- Veðbandayfirlit og fasteignavottorð (sjóðurinn getur útvegað – gjald samkvæmt gjaldskrá)
Ef óskað er eftir því að bæta við nýjum skuldara eða fella út skuldara af fasteignaláni, þarf í báðum tilvikum að framkvæma greiðslumat. Ef verið er að bæta við skuldara þá þarf sá einstaklingur að vera maki (hjón eða óvígð sambúð) upphaflegs skuldara sem og þinglýstur eigandi eignarinnar.
Umsókn: Beiðni um nafnabreytingu á láni
Ath. að sjóðurinn sendir hlekk með greiðslumati í framhaldi af umsókn.
Gögn sem þarf:
- Kauptilboð/kaupsamningur (ef við á)
- Veðbandayfirlit og fasteignavottorð (sjóðurinn getur útvegað – gjald samkvæmt gjaldskrá sjóðsins)
- Afsal (ef við á)
Ef gera þarf breytingar á veðréttum sem ganga framar í veðrétti þá þarf að óska eftir veðleyfi eða skilyrtu veðleyfi.
Meginreglan er að veðstaða sjóðsins verði ekki verri og að veðstaða standist kröfur og reglur sjóðsins eins og um nýtt lán sé að ræða.
Lántakandi getur óskað eftir að lán frá þriðja aðila fari fram fyrir veðrétt sjóðsins með því skilyrði að lán sjóðsins verði greidd upp en þá þarf að sækja um skilyrt veðleyfi.
Beiðni skal berast í tölvupósti lan@gildi.is ásamt gögnum:
- Afrit af veðskuldabréfi/bréfum sem óskað er eftir að lán Gildis þoki fyrir
- Staða áhvílandi láns sem greiða á upp (ef við á)
- Veðbandayfirlit og fasteignavottorð (sjóðurinn getur útvegað – gjald samkvæmt gjaldskrá)
*Vakin er athygli á að ekki er hægt að hækka lánsupphæð, breyta samsetningu óverðtryggðra/verðtryggðra lána eða breyta vaxtaformi lána með skilmálabreytingu. Ef lántaki vill breyta fyrrnefndum skilmálum lána, þarf að gera það í gegnum endurfjármögnun þar sem sótt er um nýtt lán með nýjum forsendum og eldra lánið greitt upp. Smelltu hér til að lesa þér til um endurfjármögnun.